ചെന്നൈ: ഇരുപത്തിമൂന്നുകാരിയെ ഭര്തൃ വീട്ടിലെ കിടപ്പുമുറിയില് മരിച്ച നിലയില് കണ്ടെത്തി. തിരുവള്ളൂരിലെ പൂണ്ടിക്ക് അടുത്ത് ശനിയാഴ്ച രാവിലെയാണ് സംഭവം. എ സി വാങ്ങുന്നതിനെ ചൊല്ലി 23കാരി മോണിക്ക ഭര്ത്താവുമായി വഴക്കിട്ടിരുന്നു. തുടര്ന്ന് മോണിക്ക മുറിയിലും ഭര്ത്താവ് ടെറസിലുമാണ് കിടന്നിരുന്നത്. പിറ്റേന്ന് രാവിലെയാണ് യുവതിയെ മരിച്ച നിലയില് കണ്ടെത്തിയത്.
രണ്ടുവര്ഷം മുമ്പാണ് 26കാരനായ ആകാശുമായി മോണിക്കയുടെ വിവാഹം നടന്നത്. മോണിക്കയുടെ വീട്ടുകാരുടെ എതിര്പ്പ് മറികടന്നാണ് വിവാഹം നടന്നത്. കുറച്ചുദിവസങ്ങളായി എ സി വാങ്ങുന്നതിനെച്ചൊല്ലി ഇരുവരും തമ്മില് തര്ക്കം നിലനിന്നിരുന്നു. ഇതാകാം മോണിക്ക ജീവനൊടുക്കുന്നതിലേക്ക് നയിച്ചതെന്നാണ് പൊലീസിന്റെ പ്രാഥമിക നിഗമനം.
കടുത്ത ചൂടിനെ തുടര്ന്ന് വെള്ളിയാഴ്ച രാത്രി ആകാശും അച്ഛനും അമ്മയും ഇളയ സഹോദരനും ടെറസില് ആയിരുന്നു കിടന്നിരുന്നത്. മോണിക്ക മുറിയിലും കിടന്നു. ശനിയാഴ്ച രാവിലെ മോണിക്ക ഉറക്കമുണരാതെ വന്നതോടെ പരിശോധിച്ചപ്പോഴാണ് മരിച്ച നിലയില് കണ്ടത്. തുടര്ന്ന് പൊലീസിനെ വിവരം അറിയിക്കുകയായിരുന്നു.
പൊലിസെത്തി പരിശോധിച്ചതിന് ശേഷം മൃതദേഹം തിരുവള്ളൂര് ഗവ. മെഡിക്കല് കോളേജിലേക്ക് മാറ്റി. മുറിയില് നിന്നും ആത്മഹത്യാക്കുറിപ്പൊന്നും കണ്ടെടുത്തിട്ടില്ല. സംഭവത്തില് പൊലീസ് കേസെടുത്തു.
(ജീവിതത്തിലെ വിഷമസന്ധികള്ക്ക് ആത്മഹത്യയല്ല പരിഹാരം. സമ്മര്ദ്ദങ്ങള് അതിജീവിക്കാന് സാധിച്ചേക്കില്ലെന്ന ആശങ്കയുണ്ടാകുമ്പോള് മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന് ശ്രമിക്കുക. 1056 എന്ന നമ്പറില് വിളിക്കൂ, ആശങ്കകള് പങ്കുവെയ്ക്കൂ)
Content Highlights: 23-year-old woman Found dead in tiruvallur chennai